الأحد، 23 يوليو 2017
الخميس، 5 فبراير 2015
أختار تخصص التصميم الداخلي ولالا؟
مساء الخير .
ها الموضوع اكثر موضوع انسأل عنه من فتحت الانستقرام وهو التصميم الداخلي ؛
- انت تدرسي هندسه ديكور ؟
اذا حابين تسألو عن موضوع تأكدو ان اسمه صحيح ، التخصص اسمه الاكاديمي " تصميم داخلي " وليس تصميم ديكور. وفجامعتنا ( جامعة الامير محمد بن فهد الاهليه ) نتخرج كـ مهندسات مو مصممات. يعني مسمانا الوظيفي مهندسه مو مصممه ( اتكلم عن جامعتنا ويختلف من جامعة لجامعة ).
اسمه التخصص بالانجليزي لو حابين تبحثو اكثر Interior Design اسم جامعتنا بالانجليزي لو حابين تبحثو عنها اكثرPrincess Mohammad bin Fahad university والاختصار لها PMU
التصميم الداخلي مو " ديكوريشن " بمعنى انه مو بس ترتيب اثاث مثل ما الكل يفكر 
تخصصي يجمع مابين الالوان، توزيع الاضاءه والاثاث، البنيه الاساسيه للغرفه وتوزيعها، التلاعب فالاضاءه وتناسق الالوان وترتيب الاغراض ووضع خطط للمكان بشكل صح واستغلال المساحات ممكن يحول لك الغرفه بشكل ١٨٠ درجه وهذي هي وظيفة تخصصنا.
كم عدد سنوات الدراسه ؟ الدراسه هي بكلريوس ٤ سنوات كاملين فكل الجامعات
في بنت سألتي سؤال عجيب تقولي : بليز اختاريلي ادخل تصميم داخلي ولا طب؟ وانا ماعرف ارسم او ارسم قليل لو دخلته بكمل ؟
ها السؤال رجاءً لحد يسأله انا ماقدر احكم وانا ماعرفكم ولا اعرف قدراتكم شلون اختار لكم التخصص بعد! 
التخصص يحتاج مهارة الرسم ( مولازم احتراف بس اقلها تعرفي ترسمي ) بعض البنات يدخلو ك مزاج ويغيرو التخصص وقت الضغط ما اخبي عليكم اللي موقده وداخلته مزاج لاتدخل 
بس اللي عندها حس فني او ذوق وحب الى ها الاشياء تدخل وبقووه وراح تبدع
الدراسه صعبه ؟ سمعت انكم ماتنامو؟ الدراسه ك اي دراسه لاي تخصص بس يحتاج "" دقه "" عليها ١٠ خطوط حمرا 
❤️في اوقات تجيك ماتنامي ايام ، في فتره تسليم المشاريع بس هذا عادي راح تتعودي عليه وماراح تكون كل ايامك كذا.
واساسا لو ما مر عليك يوم فالجامعه ماصحتي فيه وتأزمتي وأزمتي كل بيتكم فيه مابتكوني انسانه طبيعيه اصلا :) ها الشي طبيعي يوم وبيمر وبيجي بعده يوم سعيد!
لذة التسليم والنجاح ولما تشوفي شغلك كذا كامل قدامك تحسي ب متتتتتعه كبيرررره ❤️
كيف يكون السمستر مع التصميم؟ طبعا آلية الترم ( فجامعتنا ) تكون كل ترم فيه بروجكت او اثنين ع حسب
- كيف تبدأو المشاريع ؟ بدايته : ☀️ تكون بحوث ودراسات وتجميع افكار
☀️بعدها نبدا التخطيط المتقدم بحيث نرسم سكتشات وبعدها نختار السكتش النهائي
☀️ نرسم البروجكت من اكثر اتجاه يعني مثلا لو بترسمي مثلث
فالبروجكت بترسميه كانك تشوفيه من قدام ومن ورى ومن اليمين واليسار وهكذا ..
☀️ نهاية المشروع نسلم كل شي ك فاينل ف بورد او لوحه كبيره فيها كل شي سويناه من بداية الترم من ابحاث وسكتشات ف ملف والرسم الاساسي فالبورد
- كله رسم يدودي او كمبيوتر؟ ف ( جامعتنا ) اول سنتين نشتغل ع الورق بس اخر سنتين نشتغل ع اللاب والورق والبروجكت او المشروع ينطبع فمطابع كبيره
- فيه رياضيات وفيزيا وكيميا؟ هذي من المواد العامه وكل التخصصات تاخذهم ❤️ اللي يختلف ( فجامعتنا ) تخصصنا يدرس ٤ كتب رياضيات باقي التخصصات من ٥ الى ٦ كتب ( طبعا موزعين على سمسترات )
اذا بتبحثو عن الشي السهل مابتفلحو فالجامعه 
كل التخصصات فيها جانب صعب ، واذا تبون الدخل العالي تبون التخصص السهل؟ مايصير منطقيا وعقلياً وعاطفيا وكل شيئياً !! 
المدير شلون صار مدير؟ لانه اشتغل على نفسه سنين وتعب وصارت عنده خبره واثبت للكل إنه مدير وقدراته تفوق باقي الموظفين 
مافي شي بالساهل لازم نتعب عشان نحصل! 
بس التخصص جددداً ممتع ويحتاج تفكير وابداع وتجديد مو تقليد
الجمعة، 30 يناير 2015
تقرير مجلة حياة
السلام عليكم مساء الخير
ها التقرير يجيب على بعض اسألتكم اللي ممكن طرت على بالكم من حيث ، مين أنا ؟ كيف بدأت ورحلتي فالفن .
كل الشكر لمجلة حياة للفتيات والشكر الخاص للاستاذه فاطمه ال بُودي على هذا اللقاء .
الان اترككم مع التقرير :
الاشتراك في:
الرسائل (Atom)